az|en|ru

AMEA Heydər Əliyev İrsini Araşdırma Mərkəzinin 8 illik fəaliyyəti ilə bağlı tədbir keçirilib


Azərbaycan Milli Elmlər Akademiyasında (AMEA) Heydər Əliyev İrsini Araşdırma Mərkəzinin 8 illik fəaliyyəti ilə bağlı tədbir keçirilib.APA-nın məlumatına görə, AMEA-nın viste-prezidenti Arif Həşimov bildirib ki, mərkəzin www.aliyevheritage.org ünvanındakı portalı Heydər Əliyevin irsinin təbliği ilə məşğul olan ən iri elektron resursdur. Mərkəzin icraçı direktoru Fuad Babayev deyib ki, portala 185 ölkədən yüz minlərlə oxucu daxil olaraq 2 milyona qədər sənədlə tanış olub. O qeyd edib ki, oxucuları əsasən Heydər Əliyevin həyatı ilə yanaşı, Dağlıq Qarabağ münaqişəsi, Azərbaycanın neft strategiyası, iqtisadiyyatı, ordu quruculuğu, mədəniyyəti və gənclər siyasəti maraqlandırır.

AMEA Tarix İnstitutunun direktoru Yaqub Mahmudov Heydər Əliyevin həyat və fəaliyyətinin bir çox ölkənin elmi mərkəzləri tərəfindən araşdırıldığını söyləyib: “Akademiyanın Tarix İnstitutunda fəaliyyət göstərən şöbədə Heydər Əliyevin Moskvadakı fəaliyyəti dövrünü əhatə edən 2 cildlik monoqrafiya hazırlanır. Hər iki cildin Heydər Əliyevin anadan olmasının 90-cı ildönümünə qədər təqdim olunması nəzərdə tutulur”.

Tədbirdə millət vəkili Asəf Hacıyev, Heydər Əliyev İrsini Araşdırma Mərkəzi Elmi-Redaksiya Şurasının sədri Asəf Nadirov və digər natiqlər də Heydər Əliyevin fəaliyyətinin müxtəlif dövrləri haqqında danışıblar və onun zəngin irsinin araşdırılmasının vacibliyini vurğulayıblar.